May palaabuton nga 34,000 doses sang Sinovac Vaccines ang probinsya sang Negros Occidental subong nga semana.
Suno kay Negros Occidental Provincial Administrator Atty. Rayfrando Diaz, matapos sang pagbakuna sang Pfizer vaccines nga yara karun sa paghinakop sang probinsya, pagasuguran naman ang inoculation sang magaabot nga Sinovac vaccine.
Nahibaluan nga kahapon ang ikaduha nga adlaw sang pagpatigayon sang pagbakuna gamit ang Pfizer Vaccine nga ginapatigayon sa Negros Residences kag Teresita Lopez Jalandoni Provincial Hospital sa Silay City.
Ang pagbakuna sang Pfizer vaccine ang matapos naman sa maabot nga Biyernes.
Suno kay Diaz, nangin maayo ang turn-out sang duha ka adlaw nga vaccination sang probinsya.
Paathag sini nga matapos ang vaccination subong nga semana, igabakuna naman ang maga-abot nga 34,000 doses sang Sinovac vaccine sa masunod nga semana kag ini ang makabenipesyo sa 17 mil ka mga Bacolodnon.
Samtang ginpaathag naman sang provincial administrator kun ngaa sunod-sunod ang pag-abot sang mga COVID-19 vaccines sa probinsya sang Negros Occidental.
Suno kay Diaz, ini bangod nakita sang Department of Health (DOH) nga maayo kag segi-segi ang roll-out kag naplastar sang maayo ang vaccination programs sa probinsya.
Suno diri, sa ginapatigayon nga vaccination sa mga local government unit (LGU) sang tinalikdan, nakita naman sang probinsya kun sa diin ang may mataas ang acceptance kag kun diin ang gamay palang ang vaccine acceptance nga LGU.
Pahanumdom naman sini nga magpalista na sa vaccination program kun nalakip na sa A1, A2 kag A3 categories agud nga maschedule na ang pagbakuna.
