Natalana nga permahan sang gobernador sang Negros Occidental ang executive order para magrequest sa Sangguniang Panlalawigan sa pagdeklarar sang state of calamity sa probinysa.
Sa interview sang Bombo Radyo Bacolod kay Governor Eugenio Jose ‘Bong’ Lacson, kun magdeklarar sang state of calamity angot sa dako nga epekto sang pagbaha sa probinsya, lantawon man sini kun malakip sa deklarasyon ang halit nga dala sang peste sa mga pananom.
Suno sa gobernador, kun may yara na sang deklarasyon mas mahapos magprocure sang relief goods nga ipanagtag sa mga bitkima sang baha.
Samtang sa karun nagapanawagan siya sa mga mangunguma nga magsulod sa crop insurance program agud bisan papaano makabulig-bulig sa ila.
Nagpasalig man ang gobernador nga buligan sini ang mga biktima sang baha kasubong man ang mga nahalitan sang Red-striped Soft Scale Insect.
Pahayag ni Lacson, mahimo man nga ang probinsya na lamang mismo ang madeklarar sang state of calamity kag mahimo man suno diri nga ilakip na lang sini ang epekto sang RSSI… Samtang…nagdangat na sa kapin P2.6 million ang balor sang halit sa sektor sang agrikultura sa probinsya sang Negros Occidental kasunod sa pagbaha nga nagluntad.
Suno kay Engr. Jose Albert Barrogo, OIC Regional Executive Director sang Department of Agriculture – Negros Island Region, sa kabug-usan nagdangat sa 1,3224 tanan ka nanari-sari nga sapat ang nagkalamatay bangod sa pagbaha.
Apang ini ang posible pa madugangan kun maverify na.
Suno diri, madamo sa mga farmers ang naapektohan kag nadulaan sang mga pananom kag kasapatan.
Nagapakig-angot ini sa karun sa mga kongresista nga maghimo sang programa para makabulig sa mga farmers.
Amo man ang pagpangagda sini sa mga farmers nga magsulod sa crop insurance program agud makabaton sang assistance.
Samtang, nagakoordinar man ini sa probinsya sang Negros Oriental kag Siquijor sa mga programa nga makabulig sa mga mangunguma.
