Ginapanawagan sang Provincial Environment and Natural Resources Office (PENRO) officer in charge sa Negros Occidental sa mga kandidato kag supporters nga likawan ang pagpanapik sang campaign materials sa mga puno sang kahoy.
Sa interview sang Bombo Radyo Bacolod kay Engr. Joan Nathaniel Gerangaya, ginapahanumdom sini sa mga kandidato kag mga suppoters nga nga sa designated Comelec posting areas na lamang magpamutang sang campaign materials, kag indi sa iban nga area kaangay sang mga kahoy bangod ang mga kahoy ang indi man magboto.
Suno diri, kada eleksyon na lamang ang ila nga pahanumdom apang ini ang nagapadayun gihapon, apang aminado man si Gerangaya nga nagbuhin na ang mga salawayon nga aspirants kag kandidato.
Ang mga City Environment and Natural Resources Offices (CENROs) ang may team naman nga magalibot agud magpamalos sang mga campaign materials nga ginpanapik sa mga kahoy, upod sa personnel sang Department of the Interior and Local Government (DILG).
Sila ang naka-umpisa naman sa pagpamaklas sa Northen Negros Natural Park humalin pa lamang sang nakaligad nga semana.
Apang sa ila nga pagpalos, kasunod nga adlaw ini ang ginabuslan naman sang lain nga kandidato.
Paathag ni Gerangaya nga ginaturn-over nila sa Commission on Elections (Comelec) ang mga makuha nga campaign materials sa posibilidad nga mapasakaan sang kaso.
Pahanumdom sini nga kun lansangan ang kahoy, masamaran ang lawas sini kag mahapos masudlan sang virus ukon bacteria tubtob nga mapatay ang kahoy.
