Ginpahayag sang Officer in Charge sa Negros Occidental Provincial Environment and natural Resources Office (PENRO) nga may month-long celebration ang probinsya para sa Environment Month.
Bilang makabig amay sang dunang manggad sa Negros Occidental, ginpakigbahin ni Joan Nathaniel Gerangaya nga ginpatigayon ang opening sang Provincial Environment Month sang 1st week sang Hunyo kag ini ang gin-updan sang tanan nga local government units (LGUs).
Sang Hunyo 8, ang Department of Environment and Natural Resources (DENR) sang simultaneous tree planting activity kag sang Hunyo 10 kadungan sa anibersaryo sang ahensya.
Pasalig ni Gerangaya nga madamo pa sila sang mga programa para sa palibot.
Aminado man ini nga bilang ang DENR ang nagapanguna nga ahensya nga naga-amlig sa environment, dako nga challenge sa ila ang pagconserve kag pagprotekta sa dunang manggad partikular na ang pagpabangod diri gikan sa pandemic.
Pahanumdom ni Gerangaya nga ang Hunyo ang gindeklarar sang Philippine Government sa pagselebrar sang environment kun sa diin ini ang makabig nga shared responsibility sang tanan.
Paathag sini nga Hunyo ang ginpili nga petsa bangod nagtakop na ang klase sang mga estudyante gani mas madamo ang sarang makigbahin sa mga environmental activities.
Dugang pa sini nga ang Hunyo ang umpisa sang tag-ululan gani ini ang pinakamaayo nga tion para sa tree planting activities.
Ang tema subong nga bulan suno kay Gerangaya amo ang “we only have one planet” gani dapat ini nga amligan sang tanan agud nga ma-enjoy sang masunod nga henerasyon.
Gindumdom man sini nga humalin sang gintukod ang DENR sa probinsya 30 ka tuig na ang nakaligad, tuman pa gihapon ka dako sang ulubrahon bangod gamay nalang ang nabilin nga forest cover sa bilog nga Negros Island.
Ini ang tuga sang pagpang-utod sang mga licensed logging companies sadto, kasubong man ang kaingin.
Paathag sini nga ang mga kompanya ang may obligasyon kuntani nga irehabilitate ang mga ginpang-utod nga puno, apang wala ini ginbuhat gani nagtupa sa obligasyon sang DENR.
