Nagapatigayon na sang Oplan SumVac ukon Summer Vacation ang Negros Occidental Police Provincial Office.
Sa interview sang Bombo Radyo Bacolod kay NOCPPO spokesperson Police Lt. Abegael Donasco, sa Oplan SumVac nalakip naman ang ila nga pagbantay para sa Semana Santa.
Suno kay Donasco, ang mga Municipal kag City Police Stations ang ginmanduan na sa pagpatigayon sang police visibility, pinaagi sa mobile patrol, beat patrol kag pagplastar sang mga Police Assistance Desk sa mga areas of convergence ukon masami ginapadulungan sang mga tawo.
Kalakip na diri ang mga simbahan, beaches kasubong man sa mga bus stations, nga ginapaabot na nga may influx sang tawo subong nga Semana Santa kag Summer Vacation.
Pahanumdom naman ni Donasco sa mga pumuluyo nga magalagaw nga mangin responsable kag likawan ang pagtuga sang komosyon ukon alarm and scandal.
Paathag sini nga bangod madamo sang nakadeploy nga kapulisan, gilayon man nila nga pagadakpon ang mga magatuga sang disruption sa public order.
Pahanumdom man sini nga seguraduhon nga nakalock ang mga balay hinali nga magagwa bangod amat-amat man nga nagadamo ang robbery cases.
