Ginkompirmar sang tagpamaba sang Negros Occidental Police Provincial Office (NOCPPO) nga nagpagwa sang marching order si NOCPPO provincial director Police Col. Romeo Palgue nga tutukan ang imbestigasyon sa mga nagakalatabo nga mga pagpamatay sa probinsya sang Negros Occidental.
Kahapon, patay ang negosyante nga si Henie Maalat sang Eroreco Subdivision, Barangay Mandalagan, Bacolod City matapos gintiro samtang nagamaneho sang iya pick-up sa Barangay Ma-ao, Bago City.
Sa interview sang Bombo Radyo Bacolod kay Police Lt. Abegael Donasco, nagapadayon pa ang imbestigasyon sang mga kapulisan sa mga nagakatabo nga mga pagpamatay.
Suno kay Donasco, wala man gauntat ang mga kapulisan sa pag-imbestigar sa nagakalatabo nga krimen sa probinsya.
Suno diri, ginabuligan man sang NOCPPO ang mga kapulisan kag ginatinguhaan nga mahatag ang mga kinahanglanon sa imbestigasyon agud mapadasig man ini.
Nagapatigayon man sila sang scientific study of crimes managing police operations agud tun an nila kun ano ang oras kag adlaw nga nagaluntad ang madamo nga krimen agud matumod kun paano likawan ang pagluntad sang krimen.
Ginatinguhaan man sang kapulisan nga himuon ang tubtob nga masarangan agud mahatag ang serbisyo sa mga pumuluyo.
Samtang, ginahulat pa sang Bago City Police Station ang progress report sa imbestigasyon sa pagpatay kay Maalat.
Sa interview sang Bombo Radyo Bacolod kay Police Major John Joel Batustusan, hepe sang Bago City Police Station, ginpahayag sini nga wala pa sang matumod nga motibo sa krimen bangud padayon man pa ang ila imbestigasyon.
Wala man sang nakawitness sa krimen bangud malaka man ang tawo sa gintabuan sang krimen.
Sa karun, nagatipon pa sila sang dugang nga detalye para sa tul-id nga imbestigasyon.
