Nagpasalamat ang Negros Occidental Police Provincial Office sa tanan nga nagbulig para sa malinong kag matawhay nga pagpatigayon sang Panaad sa Negros Festival 2023.
Sa interview sang Bombo Radyo kay NOCPPO spokesperson Police Capt. Judesses Catalogo, may narecord nga minor incidents sa bilog nga semana nga aktibidad bangud indi gid man mapunggan ang pagluntad sini bangud sa kadamuon sang mga bisita.
Nakasuhan naman ang isa ka lalaki nga nangawat sa Panaad Park and Stadium kag priso na sa karon sa Bacolod Police Station 7.
Suno kay Catalogo, successful ang ila nga preparasyon para sa isa ka semana nga kahiwatan gani wala sang dalagko nga hitabo nga narecord.
Bangud sa nauna nga hingyo sang PNP nga ipaiway nalang ang pagdala sang armas sa festival site, nagkooperar man ang mga ini kag wala sang nadakpan nga gun ban violator.
Sa kabug-usan, 680 ka mga pulis kag iban pa nga force multipliers kaangay sang Philippine Coast Guard kag Bureau of Fire Protection personnel ang nagbantay sa seguridad sang Panaad sa Negros Festival.
