Handa nga magbulig ang Negros Occidental Police Provincial Office (NOCPPO) sa Bacolod City Police Office (BCPO) sa pagtumod sang duha ka mga bangkay sang mga tawo nga nasapwan sa Bag-ong dalan, Barangay Felisa, Bacolod City kahapon.
Sa interview sang Bombo Radyo kay Police Captain Judesses Catalogo, tagpamaba sang NOCPPO, ila ginabaton ang formal request nagikan sa BCPO kag suno diri, wala sang problema kag bukas sila sa pagbulig sa imbestigasyon agud matumod ang identity sang nasapwan nga mga bangkay sa ciudad.
Suno kay Catalogo, sarang nga makakonsulta ang BCPO sa local units sang NOCPPO, maka-access man ang mga ini sa mga data nga makabulig sa pagsolbar sang kaso.
Suno diri, wala sang restriction bangud pareho sila nga unit sang Philippine National Police kag lapitay lamang ang BCPO kag NOCPPO.
Samtang, gin-athag man ni Catalogo nga wala sang ginreport nga abduction sa La Castellana kag nakapauli na ang isa ka babaye nga ginaalegar namissing sang damlag lang.
