All set na ang Negros Occidental Police Provincial Office (NOCPPO) para sa campaign period kag adlaw sang eleksyon subong nga 2023 Barangay and Sangguniang Kabataan Elections.
Suno kay NOCPPO Director Police Col. Leo Pamitan, 100 porsyento na nga handa ang NOCPPO para sa campain period nga nag-umpisa kahapon kag magalawig tubtob sa Oktubre 28 kasubong nga handa na ang mga ini para sa Oktubre 30, adlaw sang piniliay.
51 tanan ka mga barangay ang ginakabig nga areas of concern kag tatlo diri ang yara sa red category nga amo ang Barangay Minapasok sa banwa sang Calatrava, kasubong man ang Barangay Quintin Remo kag Barangay Macagahay sa Moises Padilla.
Suno diri, wala naman sang pagbag-o sa numero sa mga areas of concern nga mga barangay.
Ang 51 ka mga barangay ang pagahamtangan sang mga security personnel apang ang tatlo nga nadagdag sa red status ang pagahamtangan sang mas madamo nga security personnel.
Nagpasalig man si Pamitan nga indi lamang sa checkpoints sila magatrabaho apang mas ipa-intensify pa ang ila pagmonitor kag paglibot sa area agud malimitahan ang hulag sang mga rebelde kag kriminal nga luyag magtuga sang kinagamo sa Barangay and Sangguniang Kabataan Elections.
