Nagbalik na sa opisina si Negros Occidental Provincial Administrator Atty Rayfrando Diaz matapos mabatun ang reinstatement order.
Sa interview sang Bombo Radyo Bacolod kay Diaz, nabatun sini ang reinstatement order gikan sa Department of the Interior and Local Government (DILG) alas-5:30 kahapon sang hapon.
Gilayon man sini nga gincontact si Negros Occidental Governor Eugenio Jose ‘Bong’ Lacson, nga nagreply lamang sang simple nga ‘report tomorrow.’
Gin-athag sini nga anom ka bulan ang orihinal nga suspension order without pay nila nanday Executive Assistant II Chery Sheil Valenzuela, apang ini ang ginpanubo sa isa ka bulan sang Office of the Ombudsman.
Bangod naglapaw na sa tatlo ka bulan ang iya nga pag-untat sa trabaho, siya ang makabatun sang back pay sa sobra nga duha ka bulan.
Magabalik naman ang fulltime nga pagtrabaho ni Provincial Legal Officer Atty Alberto Nillas Jr. nga nagserbe bilang officer in charge sang Office of the Provincial Administrator sang siya ang nasuspender.
Aminado si Diaz nga gamay lamang ang iya nga problema kun ipaanggid sa mga dalagkuan nga problema nga ginapangatubang sang probinsya.
Sa pihak sini, ginakasubo man sang opisyal nga madamo ini sang mga programa kag proyekto nga naghinay ang paghulag, nga suno diri liwat na nga mapadasig sa iya nga pagbalik.
Pahayag sini nga sa lima ka tuig, nangin maayo ang partnership nila nanday Governor Lacson kag Vice Governor Jeffrey Ferrer kun sa diin siya ang ginahatagan na lamang sang gahom sa pagdesisyon sa pila ka mga pagpatuman.
Apisar sini, pasalig ni Diaz nga ginakonsulta gid sini sa gobernador ang mga importante nga desisyon.
Paathag sini nga nagapanguna nga mando ni Lacson sa iya administrasyon ang ‘good governance kag transparency.’
Suno diri, tanan nga mga nauna nga sala antes paman ang iya administrasyon ang ginkalimtan na, apang kun segihon ang mga sala, sila ang magapanabat man.
Pasalig sini nga kun maayo ang performance sang empleyado may-ara man sang reward.
Aminado man ini nga indi malikawan nga may nagagamit sang ila mga pangalan para sa personal nga mga interes.
