Ginavalidate na sang Provincial Legal Office sang Negros Occidental ang sabat sang pinuno sang Office of the Provincial Agriculturist nga ginpapanaugan sang show cause order bangud sa wala pa mabayaran nga catering services sadtong 2018.
Nahibaluan nga ang wala pa masettle nga catering services ang yara sa P1 million humalin pa sang 2018.
Suno kay Provincial Legal Officer Atty. Alberto Nellas, ginpanaugan sang show cause order si Atty. Japhet Masculino bangud sa P1 million nga wala mabayaran nga catering services sadtong 2018.
Una naman nga ginpahayag ni Negros Occidental Provincial Administrator Atty Rayfrando Diaz nga wala pa napasaka nga administrative ang show cause ni Atty. Masculino.
Ginpahayag man sini nga nagsulat na siya sa accounting office agud ipacheck kun mahimo ini nga mabayaran kay ibayaran nalang apang nagsabat ang accounting nga indi makarelease sang pondo bangud madamo sang discrepancy sa mga papeles nga ginsubmit sang OPA.
Suno kay Diaz, ginpahayag man ni Atty Masculino nga handa ini nga bayaran ang wala masettle nga catering services.
Aminado man si Diaz nga siya mismo ang indi makahibalo sang discrepancy.
Pahibaluon man sini ang catering services sang sabat sang accounting office sang probinsya kasubong man sang sabat ni Atty Masculino kag kun may yara man sang matabo nga settlement ang OPPA Head na kag catering services ang magaestoryahanay.
Samtang, natapos naman ang formal investigation sa duha ka mga department heads nga una na nga ginpapanaugan sang show cause order.
Suno kay Nellas, ang investigation report batok sa anay Provincial Budget Officer Jose Percival Salado kag Ma. Mina Pellejo, officer-in-charge sang Negros Occidental Comprehensive Health Program Division, ang natalana nga ipagwa apang nasubmit na ini kay Negros Occidental Governor Eugenio Jose Lacson.
Wala pa mahibaluan kun ano ang rekomendasyon sang PLO batok sa duha ka mga department heads.
