Temporaryo nga pagasiraduhan ang Provincial Capitol humalin subong nga adlaw tubtob sa Biyernes bangud sa nagapadayon nga pagsaka sang kaso sang COVID-19 sa probinsya.
Sa interview sang Bombo Radyo kay Negros Occidental Vice Governor Jeffrey Ferrer, nga amu sa karun ang acting Governor matapos nagpositibo sa COVID-19 si Governo Bong Lacson, nagpagwa ini sang memorandum nga nagadeklarar nga igapaidalum sa lockdown ang ang Provincial Capitol building sa sulod sang apat ka adlaw sumugod Lunes bangud sa pagdamo sang kaso sang COVID-19.
Nahibaluan nga nagapadayon ang four-day work week sa mga empleyado gani nagawork from home ang mga ini kun adlaw sang Biyernes kag bangud nga igadisinfect ang Kapitolyo tubtob sa Huwebes, sa masunod nga semana pa liwat makabalik ang mga ini sa opisina.
Suno kay Ferrer, 19 ka mga empleyado ang nagpositibo sa virus nagikan sa nagkalain-lain nga mga departamento.
Magapadayon naman ang operation sang Provincial Health Office kag ang vaccination bangud sa lain man ini nga building nahamtang.
Suno sa bise-gobernador, may yara sila sang session sa Sangguniang Panlalawigan sa Martes apang virtual lamang ini patigayunon.
Nagpasalig man ini nga kun may yara sang mga urgent nga butang, sarang man ini mahimuan sang tikang.
Nagapadayon man ang ila komunikasyon ni Governor Lacson in kaso may mga instructions ang gobernador samtang yara ini sa isolation.
