Liwat nga ginpahanumdom sang Provincial Election Officer sa Negros Occidental sa mga kandidato nga magsunod sa rules sang Commission on Election sa pagpangampanya.
Sa interview sang Bombo Radyo Bacolod kay Atty Ian Lee Ananoria, nagpagwa si Comelec Chairman George Erwin Garcia sang listahan sang 34 ka mga partylist groups nga ginpadal-an sang notice of violation kun sa diin nalakip diri ang USWAG Negros kag Abang Lingkod Partylist.
Paathag sini nga humalin sang mag-umpisa ang ila Operation Baklas, ila nga ginapadala sa Comelec Central Office ang listahan sang mga kandidato kag partylist nga nagalapas sa campaign rules, kag sila ang ginapadal-an sa email sang notice of violation.
Suno diri, ginahatagan ang mga ini sang tatlo ka adlaw agud pamaluson ang ila illegal campaign materials agud sila ang indi pasakaan sang disqualification ukon election case.
Kalakip sa illegal postering ang pagpanapik sa gwa sang common posting areas kaangay sang poste, kahoy kag mga pampubliko nga lugar nga indi designated posting areas.
Kasubong man ang sizes sang campaign materials, kag ang “paid for by:” sa mga posters.
Samtang ginarespeto naman sang mga ini ang mga campaign materials nga ginpanapik sa mga pribado nga propidad ano man ang size sini.
Kun sila ang may makita nga nagalapas, paathag ni Ananoria nga required sila nga mga Election Officers nga magsecure sang ebidensya.
Suno diri, ang local campaign period ang maga-umpisa sa Marso 28 kag tatlo ka adlaw antes sang petsa, sila ang magapagwa man sang announcement.
Pahanumdom sini nga seryoso ang Comelec sa pag-implementar sang campaign rules.
