Bukas sa gihapon ang Negros Occidental Provincial Government sa pagbulig sa Central Philippine State University apisar nga nag-atras na ini sa pagbakal kuntani sang duha ka ektarya nga duta nga natukuran sang buluthuan sa Barangay 7, Moises Padilla.
Madumduman nga ang nagapanag-iya sang apat ka ektarya nga duta amo si former Moises Padilla Mayor Francisco Nazareno kag nag-expire na ang deed of usufruct ukon pagpahanugot sa paggamit sang CPSU sa duta sang 2017.
Kasunod sini, ang tag-iya ang nagapanukot na sang bulanan nga bayad sa paggamit sang duta, kag bangod indi masarangan, ang eskwelahan ang nagpalapit sa provincial government.
Una na nga nagkasugot sang P25 million nga balor para sa duha ka ektarya nga amo lamang ang natukuran sang eskwelahan, kag may napain naman nga budget.
Apang nagbag-o ang pinsar ni Nazareno kag ini ang nagdemand na sang mas mataas nga presyo kag nagback-out na ang provincial government sa pagbakal sang duta.
Suno kay Provincial Administrator Atty Rayfrando Diaz, magabulig lamang ang provincial government kag nagahulat lamang sila sang proposal nga ihatag.
Suno diri, kun ano man ang solusyon nga iplastar, ang provincial government mamati kag maggiyo agud makabulig sa buluthuan.
