Ginahulat na lamang sang Negros Occidental Provincial government ang ipadala nga data sang mga banwa kag ciudad nga apektado sang pagbaha sa Northern Negros agud mapadal-an sang bulig.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, indi nagid sa karun mapaktan ang panahon.
Suno diri, kahapon sang aga nag-abiso ang Philippine Atmospheric, Geophysical and Astronomical Services Administration (PAGASA) nga maka-eksperyensya sang scattered rains and thunderstorms sa Negros Occidental, apang alas-12:00 sang gab-i ang ahensya ang nag-abiso sang heavy rainfall.
Suno kay Lacson, nagsaka na ang tubig baha sa banwa sang Manapla kag mga ciudad sang Victorias kag Cadiz sang magpagwa sang notice ang Pagasa.
Bangod sa indi mapaktan nga panahon, pahanumdom sang gobernador nga mangin alerto kag panilagan ang kataason sang tubig sa mga suba sa madamol nga mga pag-ulan.
Sa impormasyon nga nabatun sini, nadecamp na ang mga evacuees sa Victorias City kag nakapauli na sa ila tagsa ka balay sang magkulpa ang baha.
Samtang ginahulat naman nila ang listahan sang kadamuon sang evacuees gikan sa banwa sang Manapla kag Cadiz City agud sila ang mapadal-an sang food packs.
Gindayaw man sang gobernador ang effort ang Provincial rescue team kag tanan nga nagbulig nga grupo kaangay sang Philippine Red Cross.
Paathag ni Lacson nga ang prayoridad gid kagab-i tubtob magkaagahon amo ang pagrescue sa mga biktima.
Ginakasubo sini nga may mga napatay nga kasapatan kaangay sang karbaw, kanding kag mga baboy, apang ginapakamaayo na lamang sini nga wala sang human casualties.
