Willing ang Negros Occidental Provincial Government nga mag-abaga sa relocation sang mga residente nga nagapuyo sa 4 km radius Permanent Danger Zone sang Bulkan Kanlaon sa banwa sang La Castellana.
Suno kay John de Asis, pinuno sa La Castellana Disaster Risk Reduction and Management Office, sa karun may 39 pa ka pamilya ukon 116 ka indibidwal nga nagapabilin sa Municipal Evacuation Center.
Madumduman nga sang mag-alburuto ang Bulkan Kanlaon, nagdangat sa kwarto mil ang mga nagpanaog kag nagtinir sa evacuation centers.
Apang ang mga nagapuyo sa gwa sang 4 km radius permanent danger zone ang napahanugutan na nga makapauli.
Ginpasalig man ni De Asis nga padayun ang paghatag sang ayuda sa mga nagapabilin sa evacuation center nga mga pumuluyo sang Barangay Masulog kag Biak na Bato.
Nahibaluan nga ang mga residente ang ginaplano na nga pangitaan sang relocation site sa gwa sang 4 km radius gikan sa crater sang bulkan.
Sa statement ni Negros Occidental Governor Eugenio Jose ‘Bong’ Lacson, ginatugyan na sini sa La Castellana Municipal Government ang pagpangita sang relocation area.
Nahibaluan nga indi man luyag sang mga pumuluyo nga marelocate sa sentro sang banwa, bangod yara sa kabukiran ang ila palangabuhian gani ginalantaw nga sila ang pangitaan sang masayluhan sa ubos-ubos lamang sang 4 km radius permanent danger zone.
Suno kay Lacson, kun makakita na sang duta kag ini ang propedad sang probinsya, ini ang pahanugutan man nila nga magamit.
Apang kun private property naman ang makita nga lugar, ginakonsiderar man sini nga baklon ang duta kun magsugot ang tag-iya.
Pasalig sini nga magabulig ang Provincial Government sa relocation efforts.
