Padayun ang pagbantay sang Negros Occidental Provincial Government sa epekto sang El Niño sa mga pananom.
Sa pahayag ni Negros Occidental Governor Eugenio Jose “Bong” Lacson, nagadangat na sa P14 million ang halit sang El Niño phenomenon, kag ini ang kalabanan naga-apekto sa mga area nga wala sang irrigation system ukon mga nagasalig lamang sa tubig-ulan.
Paathag sang gobernador nga ang mga ini ang wala ginbatun sang insurance company, bangod ginapaabot na ang pagluntad sang El Niño.
Apang ginpili gihapon sang mga farmers nga magrisgo sa pagtanom, nga nagresulta sa kahalitan sa ila mga pananom.
Sa report sang Office of the Provincial Agriculturist, nagdangat na sa 383 ang mga farmers nga apektado sang El Niño.
Matapos mag-anunsyar nga magahatag sang dyutay nga financial subsidy ang Provincial Government, madasig man nga nagdamo ang mga nag-appy.
Nagdangat naman sa 370 ektarya ang nahalitan nga agricultural crops.
Paathag ni Lacson nga magahatag lamang sila sang maarangan sang budget sang probinsya.
Ginapaabot ni Lacson nga madugangan pa ang numero sang farmers nga yara sa listahan, gani plano naman sini nga magplastar sang polisa kun sin-o lamang ang qualified nga makabatun sang financial assistance.
Pasalig ni Lacson nga maayo pa sa karun ang sitwasyon sang food supply sa probinsya bangod 50 porsyento man ang irrigated lands.
Apang panawagan sang gobernador nga likawan ang mag-usik sang tubig.
Nagmando naman ini sa pagclear sa mga kanal, agud indi magbara ang mga tubig kag mas madamo sang malab-utan.
Pahanumdom ni Lacson nga bisan ang Department of Agriculture ang una na nga nagpasalig nga indi kulangon ang bugas sa pungsod, bangod magluwas sa ani sang mga local farmers, ang gobyerno ang may natalana man nga importasyon.
Nagpabor naman ang DA sa ginapanugyan sini nga cloud seeding, apang tun-an pa kun diin nga areas ang mangin target.
