Plano sang provincial government sang Negros Occidental nga magpadala sang bulig sa mga biktima sang linog sa Cebu province ilabi na sa Bogo City.
Suno kay Negros Occidental Governor Eugenio Jose Lacson, may yara sang Collapse Structure Search and Rescue (CSSR) team nga dugang nga ipadala sa Cebu apang nagahulat pa sang go signal ang Office of the Civil Defense- Negros Island Region halin sa Office of the Civil Defense- Regional Office 7.
Suno diri, una nga napadala didto ang CSSR team halin sa ciudad sang Talisay.
Diri sa probinsya may yara sang natrained nga CSSR team sa ciudad sang Sipalay, Bago, Cadiz, San Carlos, kag Silay kag may yara man sa Provincial Disaster Risk Reduction and Management Office, nga nakastandby naman.
Samtang, nagpadala naman sang tubig kag bugas ang Local Government Unit sang ciudad sang Escalante sa Cebu kag may yara man sila sang ginpadala nga water tanker kag mobile kitchen.
Ang ciudad naman sang Cadiz nagpadala sang water purifier kasubong man ang ciudad sang Sagay nagpadala sang water purifer nga Aqua Cube.
Pahayag sang gobernador, ginapa-assess na sini ang sitwasyon sa area agud makahatag sang financial assistance sa Cebu.
Nagapangabay naman si Lacson nga kun tani wala na sang dugang pa nga mabiktima sang linog bangod madamo na gid sang nahalitan kun sa diin padayon nga nagasaka ang numero sang nadulaan sang kabuhi.
