Natalana nga magapatigayon ang Negros Occidental Provincial Government kaupod ang partner sini nga grupo sang irrigation farmers sang pagbaligya sang P20 kada kilo sang bugas sa Talisay City, Negros Occidental.
Madumduman nga una ini nga ginpatigayon sa banwa sang Pulupandan kun sa diin may yara sang 500 ka mga tawo ang nagbakal kag tag-lima ka kilo sang bugas lamang kada tawo ang mahimo mabakal.
Suno kay Negros Occidental Governor Eugenio Jose “Bong” Lacson, liwat naman nga maga-rollout sang tag P20 kada kilo sang bugas ang Negros Occidental Provincial Government paagi sa FIACN-BRISS ukon Federation of Irrigators Association of Central Negros – Bago River Irrigation System sa ciudad sang Talisay kun sa diin 500 naman ka mga indibidwal ang makabenepisyo kag mahimo lamang sila magbakal sang lima ka kilo sang bugas kada isa.
Ginpasalamatan ni Lacson ang FIACN-BRISS sa pagpag-partner sini upod sa provincial government sang Negros Occidental bangud ang nasambit nga grupo ukon asosasyon amo ang namuno sa nasambit nga programa nga una na-sugdan sa banwa sang Pulupandan.
Gin-athag sang gobernador ang ginabaligya nga bugas sang FIACN-BRISS ang indi halin sa National Food Authority kundi kaugalingon nga patubas sang ila nga mga miyembro.
