Nakahanda na ang probinsya sang Negros Occidental para sa epekto sang Bagyo Tino.
Nahibaluan nga nalakip ang Negros Occidental sa maapektuhan sang ikog sang Bagyong Tino nga ginabanta magaland fall subong nga adlaw, Nobyembre 3.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, Nobyembre 1 palang base sa rekomendasyon sang Disaster Risk Reduction Management Office, ginpaidalom na ini ang probinsya sa heightened alert bilang preparasyon sa Bagyong Tino.
Suno kay Lacson, ginpahibalo naman ang tanan nga mga Disaster Risk Reduction Management Office sang tanan nga LGU sa Negros Occidental kag preparado naman ang mga ini.
Suno sa gobernador nakadepende na sa LGU kun magpatuman sang preemptive evacuation ilabi na sa mga natumod nga lugar nga prone sa baha.
Obserbahan pa subong nga adlaw ang sitwasyon sang panahon.
Wala man sang work suspension subong nga adlaw samtang ang class suspension ang nakadepende sa tagsa ka Local Chief Executive.
Samtang ginsuspend sang pila ka mga Local Government Units ang klase bangud sa malain nga tyempo dala sang Bagyong Tino.
Suspendido ang mga klase all level subong nga adlaw, Nobyembre 3, sa Cadiz City, Moises Padilla, Binalbagan, Sagay City, EB Magalona, Manapla, La Castellana, Toboso, Bacolod City, Ilog, La Carlota City kag Talisay City, Cauayan, Hinigaran, Silay kag Himamaylan City, Negros Occidental.
Ang probinsya sang Negros Oriental ang nagdeklarar man nga wala sang klase bwas.
Kahapon nakasulod na Philippine Area of Responsibility (PAR) ang Bagyong Tino kag isa sa maapektuhan sa tion nga magland fall ang Negros Occidental bangud nakasulod ini sa trough sang Bagyo.
