Preparado ang provincial government sang Negros Occidental para maghatag sang bulig sa mga Negrosanon nga nagatrabaho sa Lebanon nga luyag magpauli.
Ini kasunod sa abiso sang Philippine Embassy sa Lebanon nga papulion ang mga Overseas Filipino Worker bangod sa nagapadayon nga konflikto sa tunga ang Hezbollah kag Israel.
May ginhamtang nga help desk sa Public Employment Service Office (PESO)- Negros Occidental, para sa mga pamilya sang OFW’s nga luyag magpangayo sang bulig.
Suno kay Karen Dinsay, in-charge sa help desk, sa record sang Overseas Workers Welfare Administration (OWWA), may 398 ka mga Negrosanon ang yara sa Lebanon kag pinakamadamo diri amo ang nagikan sa ciudad sang Bacolod nga may 61 ka OFW kag ginasundan sang ciudad sang Bago nga may 30.
Apang, tubtob sa karun wala pa sang Negrosanon sa Lebanon nga luyag magpauli sa Negros.
Pahayag ni Dinsay, magluwas sa bulig sang OWWA, Department of Migrant Workers (DMW) kag Department of Foreign Affairs (DFA), may ihatag man nga assistance ang probinsya.
Suno diri, ang Negrosanon nga luyag magpauli ang buligan sa ila nga pagbyahe kag hatagan sang cash assistance nga P5,000 sang probinsya kag ipaidalum sa Psychosocial counseling.
