Ginkilala ni Negros Occidental Governor Eugenio Jose “Bong” Lacson ang importansya sang mga kababainhan sa pagselebrar sang provincial capitol sang International Women’s Day kahapon, Marso 8.
Ang programa ang ginpatigayon sa social hall sang provincial capitol.
Suno kay Lacson nangin mabug-at nga tuig ang 2020 para sa tanan ilabi na sa bahin sang mga kababainhan.
Gindumdom sang gobernador nga sang naghatag sila sang rosas kaupod ang iban pa nga katapo sang provincial capitol sang nakaligad nga tuig bilang pagpakita sang pag-apresyar sa mga babayi.
Wala naman ang tanan nagalaum nga magapangatubang sa kabudlayan tuga sang COVID-19 pandemic, apang ini man ang nagpagwa sang ikasarang sang mga babayi.
Subong nga tuig, sa baylo nga maghatag sang bulak, ginpanghatagan naman sang gobernador ang mga babayi nga capitol employees sang mga binhi sang mga fruit trees kag hygiene kit.
Ginpakigbahin man sang gobernador ang maayo nga balita nga nangin gamay nalang ang gender gap sa tunga sang mga lalaki kag babayi sa Pilipinas.
Nahibaluan nga sa karun, halos tanan na nga sektor sang sosyodad ang ginapakigbahinan sang mga babayi.
Suno kay Lacson, nga sa workforce sang Provincial Government sang Negros Occidental, mas madamo pa diri ang mga babayi.
Samtang, nakitaan man sang dako nga importansya ang mga babayi bilang mga kabahin sang fronliners sa pagpakigbato sa COVID-19 pandemic.
