Naghingyo ang Negros Occidental provincial government sa national government nga mahatagan sang COVID 19 vaccine ang mga healthcare workers sa probinsya.
Nahibaluan nga may pila na ka mga ospital sa Bacolod kag Iloilo nga nakabatun sang share nagikan sa Sinovac.
Madumduman nga una nga nag-abot ang Sinovac sa pungsod nga ginsundan sang nag-abot nga batch gikan sa AstaZeneca.
Ini ang ginhingyo ni Negros Occidental Governor Eugenio Jose “Bong” Lacson matapos sang ginpatigayon nga programa sa International Women’s Day sa Provincial Capitol.
Nahibaluan nga kapin 8,000 ka mga medical frontliner naman ang nagatrabaho sa mga ospital nga ginamanage sang provincial government kasubong man sang mga local government units (LGUs).
Pangabay naman sini nga tempranu nga mabakunahan ang nga mga heathcare workers.
Si Lacson ang personal naman nga nagtawag sa opisina ni Senator Bong Go natuhoy sa hingyo samtang si anay Congressman Albie Benitez naman ang nagkontak kay Vaccine Czar Secretary Carlito Galvez Jr. natuhoy sa apelasyon sa share sang AstraZeneca Vaccine nga nag-abot sa pungsod.
Nagapati naman si Lacson nga limitado lang ang mabatun sang probinsya nga ginabanta yara lang sa 5,000 ukon 6,000 doses, apang seguruhon naman sang probinsya nga makaigo ini sa duha ka doses gani katunga sini ang medical frontliner nga mahatagan.
Indi naman matumod kun ano pila kag kun ano nga brand ang ipahanugot sang national government.
