Nagpatigayon sang Animal Dispersal Program para sa nagkalainlain nga mga asosasyon sang mga mangunguma sa probinsya sang Negros Occidental.
Ang pagpanagtag sang kasapatan ang ginpangunahan ni Negros Occidental Provincial Veterinarian Dr. Placida Lemana kaupod si Negros Occidental Governor Eugenio Jose ”Bong” Lacson.
Nagdangat sa balor P724,000 ang napanagtag nga mga kasapatan kahapon sang hapon.
Napanagtag sa mga mangunguma ang 12 ka baka, 800 ka free range chicken nga pisu, 48 ka bibi, lima ka karnero, napulo ka swine boar ukon butakal nga baboy kag anom ka nayon nga baboy.
Kumpleto na sa bakuna ang mga nahatag nga kasapatan, kag ini ang kinahanglan na lamang nga saguron agud makahatag sang income.
Ang mga mangunguma nga nakabatun ang magahatag naman sang buto sang ila ginsagod nga kasapatan sa probinsya, nga amo ang gamiton para sa masunod nga pagpanagtag sa lain naman nga asosasyon.
Suno kay Governor Lacson, luyag sini nga mabuligan ang mga mangunguma kag mga accredited association sa probinsya.
Dugang pa sang gobernador, nga himuon sang Negros Occidental Provincial Government nga bulanon ang Animal Dispersal Program.
