Nagpasalig ang gobernador sang probinsya sang Negros Occidental nga preparado ang probinsya sa pagbulig sa mga apektado sang paglupok sang Bulkan Kanlaon.
Sa interview sang Bombo Radyo kay Negros Occidental Governor Eugenio Jose ‘Bong’ Lacson, nakig-angot na sa iya opisina ang iban nga Local Government Units nga luyag magbulig sa mga apektado nga ciudad kag banwa kag naka-red alert status na ang areas nga tuman nga naapektohan.
Suno diri, ang banwa sang La Castellana ang tuman nga naapektohan sadto paglupok sang bulkan sang Hunyo 3 kag naintindihan sini nga gamay na gid lamang ang budget sang banwa.
Pasalig sang gobernador nga handa ang probinsya sa pagbulig kag iga-adjust man ang pag-address sa karun nga sitwasyon bangod nga nagsaka na sa alert level 3 ang bulkan.
Ginpasalamatan man sini ang pagkooperar sang mga pumuluyo nga nangin mahapos ang pagpatigayon sang evacuation bangod nainintindihan na kun ano ka sersyuso ang sitwasyon sa karun.
Samtang, nagpanugyan man ini sa mga nagabaligya sang facemask nga likawan ang pagbaligya sang mahal nga presyo kag sundon kun ano ang presyo sini sadto agud nga indi na mahalitan ang iban nga nagakinahanglan.
