Padayun ang pagtutok sang Negros Occidental Provincial Health Office sa ikaayong lawas sang mga evacuees bangod sa aktibidad sang Bulkan Kanlaon.
Sa interview sang Bombo Radyo Bacolod kay Negros Occidental Provincial Health Officer Dr. Girlie Pinongan, sila ang nagapalibot sang medical team agud tsekyaron ang health condition sang mga evacuees sa banwa sang La Castellana, kag ciudad sang La Carlota kag Bago.
Sa ila nga ginpatigayon nga monitoring, masami sa mga pamalatian nga narecord ang ubo, hilanat, sip-on, pagsakit sang ulo kag minor LBM.
Magluwas sa medical team sang probinsya, may mga naka-augment man nga health personnel sa kada tagsa ka banwa kag ciudad kag may-ara man sang mga volunteers.
Bangod sa viral infections ang kadam-an nga pamalatian, ini ang madasig naman nga nagalatun bangod sa nagatililipon nga mga pumuluyo.
Ginalantaw man nga factor sa pag-ubo kag sip-on ang ashfall bangod sa masami nga pag-alburuto sang bulkan kasubong man ang baho sang asupre.
Ginpalista naman sang Provincial Health Office ang mga kinahanglan nga bulong.
Sa karun, bastante pa ang bulong sa La Carlota City apang sila ang padayun man nga magamonitor samtang ang Bago City kag La Castellana ang ginakulang na sang bulong.
Kalabanan sa mga nagamasakit ang kabataan ukon mga senior citizen.
Samtang ginapanugyan man nga sa pagdonar sang pagkaon, ini ang ipaagi sa camp manager bangod sa masami, may ara lamang sang centralized kitchen kag tingob nga ginaluto ang mga pagkaon.
