Natalana nga magalunsyar sang Nationwide Search and Destroy Mosquito Breeding Sites Kickoff ang Department of Health sa Pebrero 24.
Ini ang patigayunon sa Lunes sang hapon kag ini ang may tema nga “Alas Kwatro Kontra Mosquito”.
Suno kay Health Undersecretary Mary Ann Maestral nga nagdangat na sang Luzon ang epidemic level kag nakita sini nga nagaamat-amat man nga nagasaka ang Dengue cases sa Visayas.
Suno kay Maestral, bangud sa nakita sini nga pagsaka sang kaso sang dengue nakapanumdom ini nga magpatigayon sang Nationwide Search and Destroy Mosquito Breeding Sites.
Panugyan sini nga tanan nga ginatiniran sang tubig dapat nga iula kag ugalion nga masami magpanglimpyo sang palibot.
Dugang pa sini nga kun may yara sang hilanat magpacheck up na gilayon bangud activated naman ang fast lane sa mga hospital kag indi na paghulaton pa nga maunahan sang dengue kag malain pa ang madangatan.
Sa kaso sang Dengue sa Negros Occidental, anum na ang dengue related deaths.
Ang kaso sang dengue sang Negros Occidental humalin sang Enero 1 tubtob Pebrero 15 ang nagsaka sa 849 ukon 387.93 percent.
Sa data sang Negros Occidental Provincial Health Office ang kaso sang nasambit nga balatian ang nadugangan sang 675 cases kun ipaanggid sang pareho nga tion sang tinalikdan nga tuig nga may yara lamang sang 174 ka kaso.
Nagapabilin ang ciudad sang Bago nga may mas madamo nga kaso nga nagdangat sa 186; nagasunod diri ang Kabankalan nga may 66; San Carlos nga may 61; La Carlota City nga may 56; Silay City nga may 44; Talisay City 36; Cauayan 36; Pulupandan 35; Hinigaran 28 kag Isabela 27.
Ang age group nga may pinakamadamo ang nagaedad sang 11 tubtob 20.
