Nagpanawagan ang Provincial Health Officer sa Negros Occidental sa mga ginikanan nga seguruhon nga makabatun sang nagakaigo nga bakuna ang mga kabataan.
Ini sa pihak sang pagduging sang whooping cough ukon pertussis sa kaingod nga Panay Island.
Sa interview sang Bombo Radyo Bacolod kay Dra. Ma. Girlie Pinonggan, sa record humalin Enero tubtob Marso subong nga tuig, may isa pa lamang ka kaso sa Corazon Locsin Montelibano Memorial Regional Hospital nga under investigation pa kun ini ang pertussis.
Sa karun, ginahulat pa ang resulta sang test.
Pahanumdom sini nga tuman ka makalalatun ang nasambitan nga respiratory infection, nga sarang makalatun pinaagi sa droplets kun naga-ubo.
Vulnerable naman diri ang mga kabataan, gani ginapanawagan ni Pinonggan nga makumpleto ang nagakadapat nga bakuna.
Suno diri, madamo sang mga nag-untat na sa pagpabakuna sang kabataan matapos ang pagduging sang pandemic, apang ini ang ila ginatinguhaan nga mabalik.
Dako nga bulig suno diri kun bakunado ang mga kabataan agud sila ang may pambato sa balatian.
Aminado si Pinonggan nga indi man mahimo ma-isolate ang mga kabataan kun sila ang ginabarukoy sang ubo, gani panugyan na lamang sini nga gilayon nga ipabulong kun may gina-ubo na sa pamilya.
Panawagan man sini sa mga ubo nga amo na mismo ang maghimo sang pamaagi agud indi makalatun sa iban kaangay sa pagsuksok sang facemask, ukon pagtabon sang panyo kun magapangatsi.
