Ginmando sang Provincial Director sang Negros Occidental Police Provincial Office sa tagsa ka City kag Municipal Police Station nga dapat may accomplishment sa anti-illegal drugs campaign sa kada adlaw.
Sa interview sang Bombo Radyo Bacolod kay NOCPPO Spokesperson Police Captain Judesses Catalogo, ini man ang nangin rasun sa mas mataas nga illegal drug recoveries sa nakaligad nga duha ka semana.
Sa accomplishment report halin Oktubre 20 tubtob 26, may napatigayon nga 24 ka anti-illegal drugs operation kag 24 man ang mga drug personalities nga nadakpan.
Ang narecover nga shabu ang nagdangat sa 163 grams nga may standard drug price nga P1,108,400.
Samtang may narecover man nga 18.94 grams sang marijuana nga may balor nga P2,272.
Sa kampanya naman batok sa loose firearms, nakapatigayon sang apat ka operasyon, apat ka suspect ang nadakpan kag apat man ang nakumpirkar nga armas-luthang.
May apat man ka armas-luthang nga ginsurrender paagi sa armas baylo bugas.
Apat man ka anti-illegal gambling operations ang napatigayon kun sa diin 11 ang nadakpan samtang may P1,970 naman nga bet money nga narecover.
May apat man ka most wanted person nga madinalag-on nga naserbihan sang warrant of arrest, samtang sa 46 ka operasyon, 47 ang nadakpan nga other wanted persons ukon mga persona nga may standing kag pending warrant of arrest.
Suno kay Catalogo, ang duha ka asod-asod nga semana nga mataas nga anti-illegal drugs accomplishment ang resulta na sang mando ni NOCPPO Director Police Col. Dennis Wenceslao nga pasanyugon ang operasyon kag dapat may madakpan sa kada adlaw.
Pasalig man sini nga wala sang planting of evidence bangod ginpahanumdom man sang NOCPPO Director nga importante nga padayun nga panguyatan ang integridad kag rule of law sa kada police operations.
Tinutuyo sini nga mabuhinan ang paglapta sang illegal nga droga ilabi na nga madamo sang krimen ang nagakakumiter bangod ang suspect ang yara sa impluwensya sang ginadumilian nga droga.
