Nagsapol kahapon ang Task Force sang probinsya sang Negros Occidental natuhoy sa nagluntad nga mga pagbaha sa norte nga bahin sang probinsya.
Ginpakigbahin ni Provincial Disaster Management Program Division (PDMPD) head Dr. Zeaphard Gerhart Caelian nga gin-estoryahan sa meeting ang nangin response sa pagbaha kasubong man sa mga assessments sang mga kahalitan.
Sa karun nagapadayun pa ang assessment sang Silay, Talisay kag Victorias City kag ginatumod pa ang kadakuon sang kahalitan ilabi na sa Imprastraktura kag agrikultura.
Samtang ginpahayag man ni Caelian nga kaupod sa meeting ang PAGASA kag nagpahayag ang mga ini nga tuga sang Tail-end sang Frontal System nga nagaapekto sa Visayas ang kabangdanan sang nangin pagbaha sa Northern Negros.
Bangod naman sa segi-segi nga nangin pag-ulan, nabuta kag nag-awas ang rain gauge kag river gauge.
Natukiban naman nga wala nag-andar ang rain gauge sang probinsya nga gikan sa Department of Science and Technology (DOST) bangod solar ini kag nagakinahanglan sang silak sang adlaw.
Panugyan ni Caelian nga gilayon nga pagkay-o sang mga kagamitan agud nga matakos ang kadamuon sang tubig ulan nga makabulig para sa tempranu nga paandam.
Naga-ayo naman ini sa (DOST) nga dugangan ang mga early warning system sa Negros Occidental.
Panugyan man ni Caelian nga dapat magpreparar sang backup system para sa mga solar powered nga mga device agud nga makaoperar ang mga ini bisan wala sang init.
Nagpangayo man ini sang dugang pa nga mga kagamitan sa Regional Disaster Risk Management Committee (RDRMC) nga magamit sang mga local government units (LGUs) para sa mga pagbaha.
Paathag ni Caelian nga nabudlayan ang mga ini sa pagresponde ilabi na kun mataas ang tubig kag kulang ang kagamitan.
Panawagan naman sini sa mga pumuluyo nga indi na hulaton pa nga mangin tagalumapaw na ang tubig-baha kag mag-evacuate.
Nahibaluan nga una na nga nagpahayag na ang Department of Environment and Natural Resources (DENR) kun magsaka ang tubig gikan sa Mt. Mandalagan, makaapekto ini sa Sicaba kag Malugo river kag amo gid ang natabo sang tinalikdan nga adlaw.
Samtang pahayag pa ni Caelian nga nagpaandam na ang PAGASA nga mag-ekspektar na sang segi-segi nga mga pag-ulan sang dugang pa nga duha ka adlaw.
