Indi tuman ang epekto sang El Niño sa livestock sa Negros Occidental.
Sa interview sang Bombo Radyo Bacolod kay Negros Occidental Provincial Veterinarian Dr. Placida Lemana, indi tuman ang epekto sang mataas nga temperatura sa mga sapat bangod sila ang sarang masaylo indi kaangay sa mga pananom.
Bangod sini, sa karun wala pa sang reported nga napatay nga sapat tuga sang El Nino phenomenon.
Ang nakita ni Lemana nga epekto sang mainit nga panahon amo ang pagniwang sang mga kasapatan.
Nagapati naman ang Provincial Veterinarian nga nakahibalo na ang mga poultry raisers sang dapat himuon bangod sila ang napaidalum naman sa madamo nga mga seminars sa pagsagod sang sapat.
Pahanumdom ni Lemana nga importante nga may maayo nga ventilation kag indi tuman ka gutok ang mga manok sa isa ka kurong agud malikawan ang heat stroke.
Dugang pa sini nga dapat may nagapondo man nga tubig nga mainom agud mapabilin nga hydrated ang mga kasapatan.
Kaangay man sini ang panugyan sang Provincial Veterinarian sa mga nagasagod sang baboy.
Suno diri, dapat dugay-dugay man nga ginabasa sang tubig ang mga baboy bangod ang kainit ang nagadugang sang stress sa sapat.
Pahayag pa sini nga dapat ilawig man sa mga mahandong nga lugar ang mga kanding, baka kag karbaw kag indi ang mga ini hatagan sang tuman ka damo nga trabaho.
Sa pihak nga bahin, ginpahayag man ni Lemana nga sang nakaligad nga bulan, nagpanagtag na ang Provincial Government sang regular medicines, vitamins kag dewormer para sa mga technicians kag veterinarian sa tagsa ka banwa kag ciudad sa Negros Occidental agud mahatag inkaso may magpalapit nga mga farmers nga magakinahanglan ukon may mga marecord nga kahalitan sa mga kasapatan sa ila tagsa ka lokalidad.
