Nagalaom ang Provincial Social Welfare and Development Office nga mas maayo na ang distribution sang educational assistance bwas, Agusto 27.
Suno kay PSWDO head Merle Garcia, ang una nga plano amo ang pagbutang sang satellite office sa sur kag isa man sa norte.
Apang nagapati si Garcia nga impractical ang pagbutang sang satellite office bangud dako ang pamasahe sang mga nagikan sa malayo nga banwa ukon ciudad kaangay sang Hinobaan.
Nakig-angot man ang DSWD Regional Office 6 agud mamangkot sang iban nga option para sa pay-out.
Suno kay Garcia, ginrekomendar niya nga himuon nalang nga kada distrito ang pagpanagtag agud mas malapit sa mga LGU.
Ginrekomendar sini nga ibutang ang payout site sa LGU nga may pinakamadamo nga benepisyaryo.
Bangud sini, nadesisyunan nga ibutang sa San Carlos ang payout site para sa First District; Cadiz para sa Second District; Silay para sa Third District; Bago para sa Fourth District; Himamaylan City para sa Fifth District; kag Kabankalan para sa Sixth District.
Aminado si Garcia nga wala sang koordinasyon ang DSWD para sa payout sang tinalikdan nga Biyernes kag wala man sang orientation gani wala sila nakabulig sa distribution, apang bangud ikaduha na ini nga adlaw sang pay-out, siya ang nagalaom nga mangin matalunsay na ang proseso.
