Diretso na sa World Series ang isa ka softball team sang Negros Occidental matapos magkampeon sa 2019 Little League Philippine Series National Finals nga ginpatigayon sa Koronadal City.
Nagikan sa tatlo ka team sang Negros Occidental, ang majors division ukon naga-edad 11-12 lamang ang nakakuha sang kampeonato matapos ginlutos ang Batangas.
Samtang nalutos naman ang juniors division ukon 13-14 batok sa Bulacan sa score nga 2-0; kag pierde man ang seniors division ukon 15-16 batok sa Bulacan team sa score nga 4-1.
Nangin emosyonal ang Negrense softbelles matapos ang kadalag-an batok sa Batangas sa score ng 4-3 kaina sang aga.
Sa interview sang Bombo Radyo Bacolod kay Coach Ramil Jalandoni, ginpasalamatan sini nga ginpakita sang mga players ang kaisog.
Suno diri, wala niya ginpressure ang mga kabataan kundi gin-engganyo lamang nga kaayuhon ang paghampang kag indi magpatalaw.
Aminado si Jalandoni nga mabakod ang ila kontra bangud kumbinasyon ini sang duha ka team sa Batangas kag nakontra man nila sang tinalikdan nga tuig.
Nagpasalamat naman ini sa tanan nga nagsuporta sa ila pagsabak sa Philippine Series.
Samtang ginkabig naman ni Coach Lizviminda Jalandoni nga lone survivor ang majors division bangud sila lang ang nagkampeon halin sa regional meet, Palarong Pambansa kag Philippine Series.
Suno kay Coach Lizvi, nagtinguha man ang juniors division nga kaayuhon ang ila performance apang madamo ang mga hits nga nag-error.
Mahimo suno sa iya nga wala nakondisyon sang husto ang paminsaron sang mga kabataan nga mabakod ang kasumpong.
Indi naman malipod suno sa coach nga mabakod ang kontra sang seniors division nga nagikan sa Batangas bangud sila ang defending champion sa World Series.
Ang World Series subong nga tuig ang patigayunon sa Indonesia.
