Diretso na sa World Series ang softball team sang Negros Occidental matapos nagkampeon sa Majors Division sa Asia-Pacific Little League Championship nga ginhiwat sa Jakarta, Indonesia.
Sa championship match kaina sang udto, ginlutos sang Negros Occidental team ang China sa score nga 17-0.
Bangud sini, nakuha sang Philippine team ang grandslam bangud sa sunod-sunod nga tatlo ka kampeonato humalin sang tuig 2017.
Sa interview sang Bombo Radyo Bacolod kay Coach Lizviminda Jalandoni, gin-untat na lang ang hampang makaligad ang 3 ka innings bangud lapaw na sa 15 ang iskor kag wala pa nakabalay ang China.
Madumduman nga sa pag-atubangay sang Philippine team kag China sa elimination rounds, ginlutos man sang pungsod ang Beijing sa iskor nga 18-1.
Ang kadalag-an suno sa coach, ang patimaan nga indi madaog-daog sang China ang Pilipinas.
Suno kay Jalandoni, dream come true ang kadalag-an sang Negros Occidental bangud makapadulong naman sa Estados Unidos ang mga softball players nga naga-edad 11 tubtob 12.
Sa 13 ka mga players, 5 ang gikan sa Moises Padilla, 1 sa Talisay, 1 sa Hinigaran, 3 sa Manapla, 2 sa Murcia kag 1 sa Silay.
Gilayon naman nila nga preparahan ang pagtiglawas sa Asia Pacific Region sa World Series nga patigayunon sa Portland Oregon sa Estados Unidos sa Agosto 7 tubtob 14.
Date of Airing: June 22, 2019 (Bombo News and Views Afternoon Edition)
