Aminado ang Negros Occidental Sports Coordinator nga gamay nalang kuntani mapabilin sang Western Visayas ang 2nd place sa Palarong Pambansa 2024.
Sa interview sang Bombo Radyo Bacolod kay Romeo Sison, alas-5:00 kaina sang aga sang magbyahe pabalik sa Negros Occidental ang mga atleta nga naghampang sa Cebu.
Madumduman nga ang National Capital Region ang nagchampion matapos makatipon sang 98 gold, 66 silver kag 74 bronze medals.
Nagpangaduha naman ang Calabarzon nga nakakuha sang 57 gold; 41 silver kag 53 bronze medal samtang nagpangatlo ang Western Visayas sa 56 gold, 41 silver kag 41 bronze medal.
Suno kay Sison, isa sa ginabantayan nila ang ulihi nga hampang sang Softball Secondary Girls kag Football Secondary Boys, nga amo kuntani ang ginalauman nga makabatak sang medal standings ilabi na nga isa lamang ka gold ang labaw sang Calabarzon.
Sa pihak sini, ginadayaw man sini ang performance sang mga atleta kun sa diin madamo sang kontribusyon ang Negros Occidental sa mga medalya nga natipon sang Western Visayas.
Ang mga ini ang nagaserbe nga pride sang Negros Occidental kag Western Visayas.
Ginpasalamatan man ni Sison ang tanan nga nagbulig kaangay sang coaches, DepEd officials kag ang suporta sang mga local government units kag provincial government.
Ang mga medalist ang makabatun naman sang incentives gikan sa Provincial Government pinaagi kay Negros Occidental Governor Eugenio Jose ‘Bong’ Lacson.
Bangod sa masunod nga tuig mahimo maseparar na ang Negros Island Region, aminado si Sison nga madamo sang adjustment nga kinahanglan temprano pa nga mapreparahan.
