BACOLOD CITY — May mga tikang nga ginapatigayon ang provincial government sang Negros Occidental agud masiguro nga indi makasulod ang bird flu.
Sa interview sang Bombo Radyo, ginpahayag ni Provincial Veterinarian Dr. Renante Decena nga may ginpahamtang nga quarantine stations sa mga pantalan kag airport sa probinsiya agud masiguro nga wala sang makasulod nga masakiton nga mga sapat, ilabi na mga manok nga may yara sang avian flu.
Ini nga mga estruktura gin-establisar sadtong may nagluntad nga outbreak sang foot and mouth disease sa bahin sang Iloilo.
Magluwas sini, suno kay Decena, may mga district veterinarians kag paravets nga amo ang naga-monitor sang mga poultry kag gamefowl farms sa mga kabanwahanan kag kaciudaran sa palibot sang probinsiya.
Nahibaluan nga nagpaguwa sang mandu ang Bureau of Animal Industry nga nagadumili sang pagpasulod sa Visayas kag Mindanao sang tanan nga manok, itlog kag semen nga nagikan sa Luzon.
Bangud sini, ginaabisuhan ni Dr. Decena ang mga nagapamulang sa Luzon nga indi na nila mabalik sa Negros Occidental ang ila inugbulang nga manok samtang ang manugbulang mismo ang ginadumilian nga makasulod sa ila nga manokan sa sulod sang tatlo tubtob lima ka adlaw.
