Wala nagakompormi si Vice Governor Jeffrey Ferrer sa pagtukod anay sang Negros Island Region paagi sa executive order samtang ginatalakay pa ang hagna sa Kongreso.
Nahibaluan nga may pila ka mga sector nga nagaduso sang pagtukod sang executive order tuhoy sa NIR samtang ginatalakay pa ang hagna sa House of Representatives.
Suno kay Ferrer, okay man ang nasambit nga suhestiyon apang mas maayo kun tingbun kag hulaton na lamang ini nga mangin layi.
Suno diri, kun ipaagi sa executive order, sarang ini nga mahukas-hukas kag daw kaangay nga “duso-butong” naman parehos sang nagligad.
Gani suno sa iya, mas maayo nga ini ang buhatan na lamang sang Republic Act agud opisyal nga mangin layi.
Samtang, nagapati naman ini nga dapat istoryahon ni Negros Occidental Governor Eugenio Jose “Bong” Lacson si Negros Oriental Governor Roel Degamo sa ila level bangud tubtob sa karun, nagapamatok ini sa gihapon sa NIR.
Suno sa bise-gobernador, tanan nga kongresista sa probinsya kag Negros Oriental ang pabor diri kag kun ano ang mangin desisyon sang mga congressman, wala sang may mahimo ang mga gobernador.
Sa consolidated bill nga ginpasa sa Kongreso, nalakip ang probinsya sang Siquijor sa pagtukod sang Negros Island Region.
