Nagapati ang gobernador sa Negros Occidental nga indi pag pabay-an sang National Government ang Negros Occidental nga ginwaswasan sang Bagyo TINO.
Sa interview sang Bombo Radyo Bacolod kay Governor Eugenio Jose “Bong” Lacson, ginbisitahan sini mismo ang banwa sang Moises Padilla kag La Castellana nga amo ang may pinakadako nga death toll bangod sa Bagyo.
Suno diri, parehas nga 11 ang napatay sa duha ka banwa samtang may 23 naman nga missing sa Moises Padilla kag 16 nga missing sa La Castellana.
Sa ulihi nga record ang mga totally damaged nga balay sa Moises Padilla ang nagdangat sa 928 samtang 3,836 naman ang partially damaged, samtang 625 naman ang totally damaged sa La Castellana kag may 891 nga partially damaged.
Ginakasubo sang gobernador ang nangin kahimtangan sang mga nagapuyo sa kilid sang suba, nga naglapad matapos gin-ab ab sang tubig, kag gin-iligan pa sang mga dalagko nga boulders ukon mga bato gikan sa ibabaw nga bahin sang Bulkan Kanlaon.
Suno diri, ang mga dalagko nga bato ang ginbuga sang Bulkan Kanlaon sang ini ang maglupok sadto.
Nakamuno naman si Moises Padilla Mayor Ella Yulo nga may rellocation site na ini nga natumod, apang aminado ang gobernador nga madugay pa ang proseso antes ini maaprubahan.
Samtang ang provincial government ang padayun naman sa pagpanagtag sang family foodpacks kun sa diin ang ila prayoridad amo ang mga narecord nga yara sa evacuation centers.
Panindugan sang gobernador nga ini ang ila nga ginahimo bilang pang-engganyo sa mga pumuluyo nga mag evacuate kun may ginapatigayon nga preemptive evacuation bangod sila ang makabatun sang suporta kun yara sa evacuation centers.
Nagapati ang gobernador nga indi pag pabay-an sang National Government ang probinsya, nga rasun man sa pagpadala kanday Tourism Secretary Cristina Frasco kag Education Secretary Sonny Angara.
