Wala pa sang deklarasyon sang state of calamity sa probinsya sang Negros Occidental bangud sa red-striped soft-scale insect (RSSI) infestation sa mga katubuhan sa probinsya.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, nagacoordinate pa sila sa Sugar Regulatory Administration (SRA) kun magasugot ang mga ini sa gindihon nga executive order nga magtukod sang task force nga magmonitor sa mga peste nga nagahalit sa katubuhan sang probinsya.
Suno kay Lacson, wala man sang deklarasyon sang state of calamity bangud indi man ini mahimo paagi sa executive order kag dapat may yara sang approval nagikan sa Sangguniang Panlungsod.
Madumduman nga una na nga nag-ayo ang SRA sa probinsya nga magdeklarar sang state of emergency apang ginpahayag sang gobernador nga ginahatag na sini sa tagsa ka mga Local Government Unit ang pagdesisyon apang wala man sang nagdeklarar kag ini ang nagapakita lamang nga indi man kinahanglan ang deklarasyon bangud ang apektado nga percentage ang indi man tuman kadako.
Suno kay Lacson, dapat nga himuan na ini sang solusyon antes pa magdako ang epekto sini.
