Gin-athag sang gobernador sang Negros Occidental nga wala sang local transmission sang coronavirus disease 2019 (COVID-19) sa probinsya.
Suno kay Governor Eugenio Jose “Bong” Lacson, ang anom ka mga kaso sang COVID-19 nga narekord sa probinsya ang lunsay may mga travel history kun sa diin kalabanan sa mga ini ang oveseas Filipino workers (OFWs).
Madumduman nga si Patient No. 1 nga isa ka 41-anyos nga babayi nagikan sa EB Magalona ang may travel history sa Manila kag Davao; si Patient No. 2 nga 42-anyos nga lalaki nagikan sa La Castellana ang naghalin naman sa Iloilo; si Patient No. 3 nga isa ka 38-anyos nga lalaki sang Silay City ang isa ka OFW nagikan sa the Netherlands kag na-stranded sa Cebu City; ang 41-anyos nga lalaki nga Patient No. 4 nagikan sa Candoni ang isa man ka OFW ang may travel history sa Ireland, Finland, Singapore, kag na-stranded man sa Cebu City.
Ang duha naman ka mga panibag-o nga kaso sang coronavirus sa probinsya ang lunsay mga seafarers nga nag-abot nagligad nga Abril 28 nagikan sa Manila.
Si Patient No. 5 ang isa ka 29-anyos nga babayi nagikan sa La Castellana kag may travel history sa Brazil samtang si Patient No. 6 naman ang isa ka 43-anyos nga lalaki nagikan sa Escalante City kag may travel history sa Dubai.
Lunsay assymptomatic ang duha kag padayon nga naka-quarantine sa provincial healing center sa EB Magalona.
