Wala sang ginhatag nga target nga dapat mabakunahan ang Department of Health (DOH) para sa Negros Occidental sa ika-apat nga hugnat sang National Vaccination Day ukon Bayanihan Bakunahan nga magasugod subong nga adlaw tubtob sa Marso 12.
Suno kay Negros Occidental Provincial Administrator Atty. Rayfrando Diaz, antes ang 4th wave sang tatlo ka adlaw nga Bayanihan Bakunahan nakabatun man ang probinsya sang dugang nga mga supply sang bakuna.
Sang Martes, ang probinsya ang nakabatun sang 25,000 doses sang Pfizer vaccine samtang kahapon, nag-abot sa Negros Occidental ang adisyunal nga 10,140 vials ukon 60,840 doses sang Pfizer vaccine nga magamit sang 12 anyos pasaka.
Samtang may nagdugang man nga 3,760 doses sang Sinovac vaccine sa probinsya.
Samtang 2,030 vials ukon 20,300 doses naman sang Pfizer vaccine nga reformulated para sa mga edad lima ka tuig tubtob onse anyos ang nag-abot sa Negros Occidental kahapon.
Paathag ni Diaz nga ang target sang probinsya sa ika-apat nga National Vaccination Day amo ang malab-ot ang 70 porsyento sang populasyon.
Samtang hatagan naman sang prayoridad sa pagbakuna ang mga Senior Citizens.
Paathag sang Provincial Administrator nga gamay palang nga prosyento gikan sa sector sang katigulangan ang nabakunahan batok sa COVID-19.
Suno kay Diaz, pahayag sang DOH nga ang age group nga dapat hatagan sang prayoridad amo ang mga kulang pa sa pagkampanya kaangay sang A2 Sector ukon Senior Citizens.
Pasalig naman sini nga bastante ang bakuna sa probinsya gani nagalaom ini nga madamo sang magapabakuna sa ika-apat nga Bayanihan Bakunahan.
Pasalig naman ni Diaz nga wala sang problema ang Negros Occidental sa vaccinators, vaccine kasubong man sa distribution.
