Daw kaangay nga nagreklamo si Negros Oriental 3rd District Rep. Arnulfo Teves sa kadasigon sang pagkadakop sang mga suspetsado sa Degamo assassination samtang wala pa nasolbar ang nauna nga mga krimen sa probinsya kalakip na ang pagpatay sa iya nga pakaisa.
Suno kay Teves, nakita sa CCTV footage nga kilala sang mga tinawo ni Governor Roel Degamo ang mga suspetsado bangud bisan ang mga ido ang wala nagtaghol kag ginpasulod man sila gilayon.
Base sa nakita ni Teves sa CCTV footage, nagapati ini nga tanda maghimo sang krimen ang mga suspetsado gani nag-apela ini sa mga netizens nga lantawon sang maayo ang video.
Suno diri, madamo sang gwardiya nagikan sa gobyerno si Degamo bisan duha lang ang allowed sa isa ka pulitiko.
Nag-apela ini sa mga nagaplano nga magsikat ukon para sa kaugalingon nga interes nga indi siya pagdalahigon kag ang iban pa gid nga mga tawo.
Nagpalab-ot ang kongresista sang pagpakig-unong sa pamilya sang mga napatay sa assassination bangud masakit madulaan sang pinalangga sa kabuhi.
Suno diri, napatay ang iya pakaisa sang tinalikdan nga binulan apang wala gihapon nasolbar tubtub subong.
Panindugan sini, indi dapat magpadayon ang ginamo sa Negros Oriental bangud luyag sini sang matawhay kag malinong nga pulitika sa probinsya.
