Kasunod sang pahayag ni Special Task Force-Negros chairman Interior Secretary Benhur Abalos Jr., ginpanindugan naman ni Justice Secretary Jesus Crispin Remulla, nga isa si suspended Negros Oriental Representative Arnolfo “Arnie” Teves Jr. sa mga ginakonsiderar nga mastermind sa pagpatay kay Negros Oriental Governor Roel Degamo.
Suno kay Remulla, sarang nila nga macontact ang mastermind kag malab-ot pa man ini sa social media, kun sa diin siya ang ginmensahe naman ni Congressman Teves sang tinalikdan nga semana.
Apang paathag sang Justice Secretary nga hibaluon pa sini ang status sa panel of prosecutors.
Madumduman nga ginpatay si Governor Degamo kag ang walo ka iban pa samtang madamo man sang nasamaran matapos ang pagpang-atake sa balay mismo sang gobernador sang Marso 4 samtang ini ang nagahatag sang bulig sa iya nga mga constituents.
Tinalikdan nga semana, ginpakigbahin ni Remulla, nga nagmensahe sa iya si Congressman Teves, nga yara sa luwas sang pungsod.
Suno diri, wala siya nagsabat sa mensahe matapos nga mabaton ang impormasyon nga may apat ka mga suspetsado sa Degamo assassination nga nagsungka sa otoridad.
