Karon sa hapon, igadul-ong na sa ulihi nga palahuwayan si Negros Oriental Governor Roel Degamo.
Kahapon gindeklarar sang Malacaniang nga special non working holiday subong nga adlaw agud makahatag sang ulihi nga pagpakita sang respeto sa gobernador.
Si Degamo kag walo ka iban pa ang ginpatay sa balay sini sa Pamplona, Negros Oriental.
Sa pihak nga bahin, nagpadala sang pormal nga komunikasyon si Negros Oriental 3rd District Congressman Arnulfo “Arnie” Teves sang duha ka bulan nga leave of absence sa House of Representatives.
Sa sulat nga na-address kay House Speaker Ferdinand Martin Romualdez, ginpabutyag ni Teves ang daku sini nga pagkabalaka sa iya nga seguridad kag subong man sang iya nga pamilya.
Ginpasiguro naman ni Teves nga magabalik ini sa trabaho sa tion nga masiguro na sini ang ila nga safety.
Nahibaluan nga si Teves ang ginatudlo nga mastermind sa pagpatay kay Negros Oriental Governor Roel Degamo sadtong Marso 4 sa pihak nga yara ini sa Amerika agud nga magpabulong kag tubtob sa karon wala pa nahibaluan ang ginahamtangan sini.
Hugot nga seguridad ang igahatag sang mga suldado kag kapulisan sa lubong ni Negros Oriental Governor Roel Degamo.
Ang mga Ceres buses nga sakyan sang magatambong sa lubong ang magabiya sa Capitol grounds alas-10:00 sa aga.
Ang bangkay ni Governor Degamo sa ila nga balay ang dal-on sa Bonawon Catholic Parish Church ala-1:30 sa hapon kag patigayunon ang misa alas-2:00 sa hapon.
Alas-3:00 sa hapon, igalubong ang gobernador sa ugsaran sang ila nga balay sa Bonawon, Siaton, tupad sa iya nga mga ginikanan kag utod.
Sa interview sang Bombo Radyo kay Major Cenon Pancito III, spokesperson sang Joint Task Force Negros, nagaupod ang mga suldado kag kapulisan sa paghatag sang seguridad sa kun diin man dal-on ang bangkay ni Degamo – halin sa Kapitolyo sa Dumaguete City padulong sa Siaton nga amo ang iya hometown.
Naghingyo man ini sa mga pumuluyo nga talikdan na ang violence bangud wala ini sang maayo nga madulot sa komunidad.
