Nagahingyo si Negros Oriental Rep. Arnolfo “Arnie” Teves Jr. sa iya nga mga kaupdanan sa House of Representatives nga batakon na ang 60-day suspension nga ginanaog batok sa iya, sa panindugan nga ang pagpamahog sa iya kag sa iya nga pamilya ang wala sang physical proof.
Sa sulat nga ginpadala sa House Committee on Ethics and Privileges ni Atty Ferdinand Topacio, legal counsel ni Teves, nga ang pagpamahog kay Teves ang nahulog sa indi malikawan nga sirkumstansya nga nagapugong agud ini ang makatambong physically sa mga sesyon sang Kamara sa idalum sang Section 71 sang Rule IX sang House Rules.
Paathag ni Topacio nga ang pagpamahog sa kabuhi ang indi masami mahatagan sang tangible proof, apang pahanumdom sini nga ang bisan sin-o ang may kinamatarong sa paghalong kun may-ara sang pagpamahog sa ila nga kabuhi.
Madumduman nga tinalikdan nga semana, nahisugtan sa House of Representatives ang pagsuspender kay Teves sa sulod sang 60 ka adlaw bangod sa indi sini pagpakita karun nga may mga criminal complaints batok diri may kaangtanan sa mga pagpamatay sang 2019.
Ang kongresista ang gina-angot man sa pagpatay kay Negros Oriental Governor Roel Degamo.
Pasalig ni Topacio nga wala sang intensyon ang bahin ni Teves sa pagpamalibad sa pagtuman sa iya nga trabaho bilang House member.
Suno sa abogado, ginapalab-ot nila ang intensyon kag ginatindugan ang commitment ni Congressman Teves sa pagpartisipar sa mga sesyon, kag wala ini nagapamalibad sa pagtuman sa iya nga trabaho ukon wala sang katuyuan nga bastosun ang otoridad kag dignidad sang Kongreso.
Dugang pa sang legal counsel nga ginapangamuyo nila nga batakon na ang suspensyon kay Congressman Teves kag ini ang pahanugutan sa pagpartisipar sa mga sesyon kag pahanugutan nga matuman ang iya nga trabaho bilang House member virtually.
