Dapat nga mag-eksplekar si Negros Oriental Third District Representative Arnie Teves sa Ethics Committee sang Kongreso tuhoy sa iya indi pagpauli sa Pilipinas apisar nga naglapse na ang iya travel authority.
Madumduman nga gindeny ni House Speaker Martin Romualdez ang request ni Teves nga i-extend sang duha ka bulan ang iya pagtinir sa Estados Unidos matapos nag-expire ang iya travel authority sang Mayo 9.
Nagapanindugan si Romualdez nga dapat magpauli sa Pilipinas sa madasig nga tinion si Teves bangud wala sang maayo nga mahimo ang iya pagpalagyo.
Sa interview sang Bombo Radyo kay Negros Occidental 5th District Representative Atty. Dino Yulo, lab-as pa ang kaso AWOL sa mga kongresista kag indi ang labing una nga natabo sa eksperyensya ni Yulo.
Suno sa iya, igadeklarar ini nga absent apang sa karun, siya ang ipa-eksplikaron sang Ethics Committee.
Kun indi makabaton sang response ang komitiba, sila ang pormal nga maga-exercise sa ila jurisdiction tuhoy sa nasambit nga butang.// Suno kay Yulo, nagtawag sila sang committee hearing agud maka-acquire sang jurisdiction ang committee.
Kun indi makabaton sang sabat nagikan kay Teves ang committee, siya ang posible nga masuspendi ukon ma-expel depende sa igahatag nga penalidad sang plenary.
Ini naman ang labing una nga tion suno sa iya nga may madeklarar nga AWOL sa Kamara in kaso nga indi pa magpauli si Teves kag mahimuan na sang tikang sang komitiba.
In kaso naman nga madeklarar nga nag-AWOL ang isa ka kongresista, wala sang patigayunon nga special election sa iya distrito.
Suno kay Yulo, apisar nga yara sa luwas sang pungsod si Teves, indi naman apektado ang buluhaton sa Kongreso.
