Ginkompirmar sang Provincial Government Information Officer sang Negros Oriental nga wala pa sang may ginmando nga community quarantine ukon travel restrictions sa probinsya.
Sa interview sang Bombo Radyo kay Bimbo Miraflor, ginpahayag sini nga wala na sang positibo nga kaso sa Negros Oriental bangud nagtaliwan na kahapon ang isa ka 62-anyos nga konsehal sa Tayasan, Negros Oriental nga nagpositibo sa coronavirus disease (COVID-19) matapos magtambong sa convention sang Philippine Councilors League sang Pebrero.
Apisar sini, suno kay Miraflor, wala gihapon sang may ginpapanaog nga executive order tuhoy sa pag-implementar sang community quarantine ukon travel restrictions ang gobyerno sa Negros Oriental.
Suno sa iya, biskan sin-o ang sarang nga makasulod sa probinsya apang kinahanglan nga itsekyar ang body temperature sang mga ini kag kun may yara sang sintomas sang COVID-19.
Suno kay Miraflor, sa 15 ka mga persons under investigation ukon PUIs, tatlo pa lang ang may yara na sang resulta kag lunsay negatibo ang mga ini.
