55 porsyento na ang nabalik nga power supply gikan sa mga pamalay nga nadulaan sang kuryente sa franchise area sang Negros Electric and Power Corporation (NEPC) tuga sang Bagyo Kristine.
Sa interview sang Bombo Radyo Bacolod kay Engr. Leomel Tambanillo, assistant Vice President for Planning and Business Operations sang Negros Power, as of 8:00 am, 55 porsyento na ang napasiga nga balay gikan sa 1,946 nga naka-eksperyensya sang brownout ukon 627 ka mga balay.
Ini ang ginalakipan sang 458 ka balay sa Bacolod City kag ginatos gikan sa Bago City, Salvador Benedicto, Murcia, Silay City kag Talisay City, Negros Occidental.
Ang nasambitan nga power interruptions ang narecord humalin sang Oktubre 22.
May-ara man sang nagtrip off nga subtransmission line nga nakaapekto sa Bacolod-Silay feeder, Bacolod-Bata Feeder kag Bacolod-San Enrique Feeder.
Paathag ni Tambanillo nga ang nagapanguna nga rasun sa brownout amo ang mga nagkalatumba nga kahoy, nautod nga sanga nga nagtanday sa linya sang kuryente, natumba nga poste ukon na-utod nga primary kag secondary lines.
Paathag sini nga expose gid ang mga overhead lines sa kaangay nga sitwasyon kun sa diin mabaskog ang ulan kag hangin, nga nagatuga sang power interruptions.
Sa pihak nga bahin, ang pagpatay-siga sang kuryente ang indikasyon naman nga nagagana ang gin-install nga Automatic Circuit Recloser.
Suno diri, kun may-ara sang temporary fault sa linya, automatic nga magatrip off ang kuryente, kag magabalik man makaligad sang lima ka segundos.
Ini ang nagakatabo kun may mga nagabunggo sa linya kaangay sang sanga sang kahoy.
Apang hinali magbalik kag yara gihapon ang faulty line, may dugang nga 80 segundos nga pagkapatay sang kuryente kag sa ikatatlo nga kahigayunan, dira nalockout ang linya.
Panawagan ni Tambanillo sa mga member-consumer nga may complaint kag indi makasulod sa hotline, nga magmessage sa facebook page sang Negros Power.
Ini bangod sila ang may 11 lamang ka hotline samtang 220,000 naman ang member-consumers.
