Ginkumpirmar sang Assistant Vice President for Operations sang Negros Electric and Power Corporation nga hungod nila nga ginpatay ang power supply sa pila ka areas nga ginbaha kahapon.
Madumduman nga may pila ma mga lugar nga nakaeksperyensya sang pagbaha kahapon bangod sa Severe Tropical Storms OPONG.
Sa interview sang Bombo Radyo Bacolod kay Engr Leomel Tambanillo, hungod nila nga gin-isolate ukon ginpatay ang linya sa mga lugar nga apektado sang baha santo sa request sang City ukon Municipal Disaster Risk Reduction and Management Offices kaangay sang Brgy Pahanocoy kag Brgy Banago.
Umpisa nga ginpatay ang kuryente alas-8:43 sang aga bangod sa mga pagbaha samtang nabalik man ang power supply alas-4:30 sang hapon.
May gin-isolate man sila nga area sa Barangay Zone 11 kag Zone 4A sa Talisay City bangod sa baha.
May-ara man sang isolation nga ginhimo sa Barangay Balingasag kag Sampinit sa Bago City halin alas-5:00 tubtob alas-11:30 sang aga bangod sa pagpatigayon sang clearing sa mga kahoy.
Pahayag sini nga nagatuga sang pagtrip-off sang kuryente ang pagbunggo sang sanga sang mga kahoy sa linya, partikular na nga mabaskog ang hangin bangod sa Bagyo.
Ginapakamaayo na lamang ni Tambanillo nga bangod sa rehabilitation effort sang Negros Power, indi na malala ang power interruption.
Ini bangod na-islan na nila ang mga bare wire sang insulated tree wire, gani indi na magtrip-off bisan mabungguan sang sanga kag kun ano paman nga mga butang nga ginapalid sang mabaskog nga hangin.
Suno kay Tambanillo, ini ang positibo nga improvement sa ila isa ka tuig nga rehabilitation.
Pasalig sini nga sila ang may apat pa ka tuig nga rehabilitation efforts, agud mahatag ang mataas nga lebel sang serbisyo.
