Nagapanawagan ang presidente sang Negros Electric and Power Corporation (NEPC) sa mga pumuluyo paagi sa broadcast media sang paghangop bangud sa mga nagaluntad nga mga power interruptions.
Suno kay Roel Castro, nagapangayo sila sang paghangop bangud ang mga linemen ang wala man nagakulang kag ginasulay ang ulan, init kag bisan nagabagyo agud lamang nga mapabalik ang electric connection sa tion nga magbrown-out.
Suno pa diri, bisan nga naglain na ang ownership, indi man madula gilayon ang pagluntad sang brown-out bangud nga ang mga pasilidad ang mga daan na gid man kag gina-amat amat pa islan.
Isa na diri ang underground cabling system.
Samtang kahapon nagpatigayon ang NEPC sang underground cabling kag una nga patigayunon sa bahin sang Lacson St, Bacolod City sa kalabaon nga isa ka kilometro.
Ini ang may budget nga P79 million kag tinutuyo nga maumpisahan sa Enero kag matapos sa Oktubre masunod nga tuig.
Suno kay Castro, ang underground cabling ang isa sa ila proyekto nga gincommit agud nga mangin lovable kag livable ang ciudad sang Bacolod.
Suno diri, amat-amat lamang ang ila trabaho sa pagdevelop sa ciudad apang ila ginatinguhaan nga mahatag ang kunmpleto kag insakto nga serbisyo sa mga konsumedor.
Bangod sini nangayo sang pagpaintindi ang NEPC samtang padayon ang ila nga pagtuman sang ila promisa.
Dugang pa ni Castro, kun kaisa malawig ang oras sang duty sang mga personnel agud lamang mapabalik ang kuryente kag mahatagan sang husto nga serbisyo ang mga pumuluyo.
Ang underground project ang pinakauna nga undergound cabling nga patigayonon sa ciudad sang Bacolod kag probinsya sang Negros Occidental.
